(ترہت نیوزڈیسک)
بہار میں ڈینگو کے مریضوں کی تیزی سے بڑھتی ہوئی تعداد خوفزدہ کرنے لگی ہے۔ ریاست بھر میں ڈینگو کے مریضوں کی تعداد 12 ہزار سے تجاوز کر گئی ہے جبکہ ڈینگو سے اب تک 41 افراد جان کی بازی ہار چکے ہیں۔ خاص طور پر اکتوبر کے مہینے میں ڈینگو کا اثر نظر آتا ہے۔ پچھلے پانچ دنوں سے روزانہ اوسطاً 364 مریض مل رہے ہیں جو کہ اب تک کی سب سے زیادہ ہے۔
اکتوبر میں ڈینگو نیا ریکارڈ بنانے کی طرف بڑھ رہا ہے۔ ریاست میں گزشتہ 24 گھنٹوں میں ڈینگو کے 337 نئے مریض پائے گئے ہیں۔ جس میں سب سے زیادہ 177 مریض پٹنہ میں پائے گئے ہیں۔ جبکہ سارن میں 22، ویشالی میں 16، مظفر پور میں 15 اور بیگوسرائے میں 13 مریض پائے گئے ہیں۔ ریاست بھر کے 12 سرکاری میڈیکل کالجوں میں 255 مریض داخل ہیں۔ اس سال اب تک ریاست میں ڈینگو کے 12,819 مریض پائے گئے ہیں۔
ریاست میں ڈینگو سے سرکاری طور پر مرنے والوں کی تعداد 41 تک پہنچ گئی ہے۔ پٹنہ میں ڈینگو سے اب تک سب سے زیادہ 11 لوگوں کی موت ہو چکی ہے۔ بھاگلپور میں 6، سمستی پور میں 3، مظفر پور میں 3 اور بیگوسرائے میں 3 لوگوں کی موت ہوئی ہے۔ ڈینگو کے مریضوں کی مسلسل بڑھتی ہوئی تعداد نے محکمہ صحت کو پریشان کر دیا ہے۔ محکمہ صحت نے ریاست کے تمام سرکاری اسپتالوں میں ڈینگو وارڈ بنائے ہیں، جن میں بڑی تعداد میں مریض داخل ہیں۔