“نفرت چھوڑو، بھارت جوڑو” کے نعرے کے ساتھ چمپارن پہنچا کانگریس کا پیدل مارچ، باشندگان ڈھاکہ نے کیا پرتپاک استقبال

(ترہت نیوز ڈیسک)

بہار کے ریاستی صدر اکھلیش سنگھ اور کانگریس کے انچارج بھکت چرن داس کی قیادت میں اتوار کو ہزاروں کانگریسیوں کی بھارت جوڑو پدیاترا شیوہر سے مشرقی چمپارن پہنچی۔ مشرقی چمپارن کے کانگریس صدر شیلیندر شکلا، سابق ایم ایل اے منوج سنگھ اور بلاک صدر کانگریس کمیٹی ڈھاکہ محمد امتیاز اختر سمیت مشرقی چمپارن کے تمام کانگریسی لیڈران و کارکنان نے دیواپور گھاٹ پر بھارت جوڑو پد یاتریوں کا پھول مالاؤں و گلدستہ کے ساتھ شاندار استقبال کیا۔ بہار میں یہ بھارت جوڑو پدیاترا بانکا کے مندیر پربت سے شروع ہوئی اور 1200 کلومیٹر کا فاصلہ طے کرنے کے بعد یہ پد یاترا مشرقی چمپارن کے ڈھاکہ پہنچی، جہاں چمپارن پہنچتے ہی عوام نے سڑکوں کے کنارے قطار لگا کر اس پد یاترا میں شامل لوگوں کو گلاب کے پھول پیش کئے۔ وہیں بھنڈار چوک پر کانگریس لیڈر افروز عالم سمیت ہزاروں لوگوں نے یاترا کا خیر مقدم کیا۔ دیواپور گھاٹ سے یہ مارچ ڈھاکہ پہنچا جہاں سابق ایم ایل اے ڈھاکہ فیصل رحمن نے اپنی رہائش گاہ پر ان پیدل مارچ کرنے والوں کا پرتپاک استقبال کیا۔ ڈھاکہ گاندھی چوک پر ان پد یاتریوں نے عوام سے خطاب کیا۔ عوامی خطاب کے دوران بہار کانگریس کے ریاستی صدر ڈاکٹر اکھلیش پرساد سنگھ نے کہا کہ اس دورے کا مقصد ہندوستان میں مذہبی منافرت کی سیاست کو محبت میں بدلنا ہے، 2014 سے آج تک بی جے پی نے ملک کو ہر سطح پر کمزور کیا ہے۔ دوسری جانب کانگریس کے انچارج بھکت چرن داس نے کہا کہ ہندو، مسلمان، سکھ اور عیسائی سبھی بی جے پی کی نفرت کا شکار ہیں، آج ملک سسک رہا ہے، عوام کو ہوش میں آنے کی ضرورت ہے تاکہ دم توڑتی بھائی چارگی اور مندمل ہوتی گنگا جمنی تہذیب کو دوبارہ زندہ کیا جا سکے۔ اس بھارت جوڑو یاترا میں شامل ایم ایل اے سنتوش مشرا، ایم ایل اے آنند شنکر، بہار کے ریاستی وزیر آفاق عالم، آکاش سنگھ، سابق ایم ایل اے منوج کمار سنگھ، سابق وزیر بہار اودھیش سنگھ، بہار کانگریس دل کے لیڈر اجیت شرما، بہار پردیش کانگریس کے انچارج بھکت چرن داس، ضلع پریشد صدر گپو رائے، ضلع صدر کانگریس موتیہاری شیلیندر شکلا، سابق ریاستی صدر مدن موہن جھا وغیرہم نے عوام سے خطاب کیا، ڈھاکہ بلاک کانگریس کمیٹی صدر محمد امتیاز اختر کے خطاب کے ساتھ اس خطابی اجلاس کا اختتام ہوا۔ اس بھارت جوڑو یاترا کا استقبال کرنے والوں میں آنند کمار سنگھ، سیف اللہ عرف برکت خان، آدرش شریم، انور عالم، بنٹی چودھری، یوتھ ضلع صدر بٹو یادو، پنٹو خان، پٹنہ دیہی منڈل کے صدر ڈاکٹر آشوتوش کمار، بلاک صدر امتیاز اختر، اوماشنکر یادو، وندیشوری سنگھ، احمد خان، وصی الرحمان، رام پریہ مشرا، محمد۔ جنید، محمد۔ کاظم، رنجیت جھا، سمیت رنجن، برج موہن سنگھ سمیت کئی رہنما شامل تھے۔