(ترہت نیوزڈیسک)
بہار کے رنجن کمار کی مختصر فلم ‘‘چمپارن مٹن’’ کا ملک اور دنیا میں چرچا ہو رہا ہے۔ یہ فلم آسکر ایوارڈ کے سیمی فائنل میں پہنچ گئی ہے۔ آرٹ کلچر کے وزیر جتیندر کمار رائے نے جمعرات کو ڈائریکٹر رنجن کمار کو اس کامیابی کے لیے اعزاز سے نوازا۔ رنجن کمار کو مبارکباد دیتے ہوئے وزیر جتیندر کمار رائے نے کہا کہ آج بہار کو رنجن کمار پر فخر ہے۔ چمپارن کے مٹن کو لوگ کھانے کے نام سے جانتے تھے۔ آج رنجن نے اپنی اسکرپٹ سے پورے ملک اور دنیا میں بہار کا ڈنکا بجایا ہے۔
جتیندر کمار رائے نے بتایا کہ رنجن کمار بہار کے رہنے والے ہیں اور انہوں نے پونے کے انسٹی ٹیوٹ میں تعلیم حاصل کرنے کے بعد تیار کردہ اسکرپٹ پر مبنی ایک مختصر فلم بنائی۔ یہ قابل تعریف ہے۔ یہ ملک کی واحد فلم ہے جو آسکر ایوارڈ کے سیمی فائنل میں پہنچی ہے۔ وزیر نے کہا کہ بہار کے کئی لالوں نے فلم چمپارن مٹن میں کمال کیا ہے۔ ان تمام فنکاروں کے لیے میری نیک خواہشات۔ سب کی محنت کا نتیجہ ہے کہ اسے آسکر ایوارڈ کے لیے منتخب کیا گیا ہے۔
